Author: Front Desk

ന്യൂഡൽഹി: മഹാത്മാഗാന്ധിയുടെ അഹിംസാ മാര്‍ഗം ഇന്ത്യയ്ക്കു നേടിത്തന്നത് സ്വാതന്ത്ര്യമായിരുന്നില്ല, ഭിക്ഷയാണെന്ന് ബോളിവുഡ് താരം കങ്കണ റനൗട്ട്. സമൂഹമാധ്യമങ്ങളിൽ പങ്കുവച്ച കുറിപ്പിലാണ് വീണ്ടും കങ്കണയുടെ വിവാദപരാമർശം. ഒരാൾ തന്റെ ഒരു കവിളത്തടിച്ചാല്‍ മറുകരണം കാണിച്ചു കൊടുക്കണമെന്നു പഠിപ്പിച്ച ഗാന്ധിജിയാണോ ഇന്ത്യയ്ക്ക് സ്വാതന്ത്ര്യം നേടിത്തന്നതെന്നും നിങ്ങള്‍ നിങ്ങളുടെ ആരാധ്യ പുരുഷനെ ബുദ്ധിപൂര്‍വം തിരഞ്ഞെടുക്കണമെന്നും കുറിപ്പിൽ പറയുന്നു.

‘നിങ്ങള്‍ ഗാന്ധിയെ ആരാധിക്കുന്നോ, അതോ നേതാജിയെ അനുകൂലിക്കുന്നോ? നിങ്ങള്‍ക്ക് രണ്ടുപേരെയും ഒരു പോലെ അംഗീകരിക്കാന്‍ പറ്റില്ല. അതുകൊണ്ട് തീരുമാനിക്കൂ’ എന്ന ശീർഷകത്തിലുള്ള പഴയ പത്ര റിപ്പോർട്ടും കങ്കണ പങ്കുവച്ചു. മഹാത്മാഗാന്ധി, ജവാഹർലാൽ നെഹ്റു, മുഹമ്മദ് അലി ജിന്ന എന്നിവരുടെ നേതൃത്വത്തിൽ നേതാജിയെ കുടുക്കാൻ ബ്രിട്ടിഷുകാരുമായി കരാറുണ്ടാക്കിയെന്നു വാദിക്കുന്ന പത്ര റിപ്പോർട്ടിന്റെ അടിസ്ഥാനത്തിലാണ് കങ്കണയുടെ വിമർശനം.

ന്യൂഡല്‍ഹി: രാഷ്ട്രപതി ഭവനില്‍ അതിക്രമിച്ച് കടക്കാന്‍ ശ്രമിച്ച രണ്ടുപേര്‍ അറസ്റ്റില്‍. ഡല്‍ഹിയിലെ സലൂണില്‍ ജോലിചെയ്യുന്ന യുവാവിനെയും യുവതിയെയുമാണ് പോലീസ് പിടികൂടിയത്. തിങ്കളാഴ്ച രാത്രി 9.30 ഓടെയായിരുന്നു സംഭവം.

മദ്യലഹരിയിലാണ് യുവാവും പെണ്‍സുഹൃത്തും രാഷ്ട്രപതി ഭവനില്‍ അതിക്രമിച്ച് കടക്കാന്‍ ശ്രമിച്ചതെന്ന് പോലീസ് പറഞ്ഞു. ഉടന്‍തന്നെ പോലീസെത്തി ഇരുവരെയും കസ്റ്റഡിയിലെടുക്കുകയായിരുന്നു. സംഭവത്തില്‍ പ്രതികളുടെ അറസ്റ്റ് രേഖപ്പെടുത്തിയതായും എഫ്.ഐ.ആര്‍. രജിസ്റ്റര്‍ ചെയ്തിട്ടുണ്ടെന്നും പോലീസ് പറഞ്ഞു.

ന്യൂഡൽഹി: പുനഃസംഘടന തുടരാനുള്ള കെപിസിസി നേതൃത്വത്തിന്റെ നീക്കത്തിൽ എഐസിസി വ്യക്തത വരുത്തണമെന്ന് മുൻ മുഖ്യമന്ത്രി ഉമ്മൻ ചാണ്ടി. രാഷ്ട്രീയകാര്യ സമിതി ഉപദേശക സമിതി മാത്രമാണെന്ന പ്രതിപക്ഷ നേതാവ് വി.ഡി.സതീശന്റെ പ്രസ്താവനയിലുള്ള അതൃപ്തി കോൺഗ്രസ്‌ അധ്യക്ഷ സോണിയ ഗാന്ധിയെ ഉമ്മൻ ചാണ്ടി നേരിട്ടറിയിച്ചു. അച്ചടക്ക നടപടികൾ പാർട്ടി ഭരണഘടനയ്ക്ക് അനുസൃതമാണോ എന്ന കാര്യം പരിശോധിക്കാൻ അച്ചടക്ക സമിതിയെ നിയോഗിക്കുന്നത് കൂടിക്കാഴ്ചയിൽ ചർച്ചയായി.

ജനറല്‍ സെക്രട്ടറി താരിഖ് അന്‍വര്‍ ഇന്ന് കേരളത്തിലെത്തും. കെപിസിസി പുനഃസംഘടന വിവാദങ്ങൾക്ക് ശേഷം വിഷയത്തിൽ ആദ്യമായാണ് കോൺഗ്രസ്‌ അധ്യക്ഷ സോണിയ ഗാന്ധിയെ ഉമ്മൻചാണ്ടി നേരിട്ട് കാണുന്നത്. സംഘടനാ തിരഞ്ഞെടുപ്പ് പ്രഖ്യാപിച്ച സാഹചര്യത്തിൽ സംസ്ഥാനത്ത് വിശാല തലത്തിൽ നടത്തുന്ന പുനഃസംഘടനയോടുള്ള അതൃപ്‌തി കോൺഗ്രസ്‌ അധ്യക്ഷയെ ഉമ്മൻ ചാണ്ടി അറിയിച്ചു. പുനഃസംഘടനയോട് എതിർപ്പില്ല. എന്നാൽ മുതിർന്ന നേതാക്കളെ കൂടി വിശ്വാസത്തിലെടുത്ത് മാത്രമെ പുനഃസംഘടന നടത്താവൂ. ഇക്കാര്യത്തിൽ എഐസിസി വ്യക്തത വരുത്തണം– അദ്ദേഹം പറഞ്ഞു.

ന്യൂഡൽഹി: ത്രിപുര സംഘർഷവുമായി ബന്ധപ്പെട്ട് അഭിഭാഷകർക്കും മാധ്യമപ്രവർത്തകനുമെതിരെ യുഎപിഎ ചുമത്തി കേസെടുത്ത സംഭവത്തിൽ തുടര്‍നടപടി സ്വീകരിക്കരുതെന്ന് സുപ്രീം കോടതി. ഇത് സംബന്ധിച്ച് കേന്ദ്ര സർക്കാരിനും, ത്രിപുര സർക്കാരിനും സുപ്രീം കോടതി നോട്ടീസ് നൽകി. മാധ്യമപ്രവർത്തകൻ ശ്യാം മീര സിംഗിനും രണ്ട് അഭിഭാഷകർക്കുമെതിരെ ചുമത്തിയ കേസിലാണ് സുപ്രീം കോടതി നോട്ടീസ് നൽകിയത്.

ത്രിപുര സംഘർഷവുമായി ബന്ധപ്പെട്ട് സോഷ്യൽ മീഡിയകളിലെ പോസ്റ്റും മറ്റു പ്രവർത്തനങ്ങളുടേയും പശ്ചാത്തലത്തിലാണ് പോലീസ് ഇവർക്കെതിരെ യുഎപിഎ ചുമത്തി കേസെടുത്തത്. എന്നാൽ കേസിൽ ഉടൻ നടപടികളിലേക്ക് കടക്കരുതെന്നാണ് സുപ്രീംകോടതി നിർദേശിച്ചത്.

ചീഫ് ജസ്റ്റിസ് എൻവി രമണ, ജസ്റ്റിസ് ഡിവൈ ചന്ദ്രചൂഡ്, സുര്യ കാന്ത് എന്നിവരടങ്ങുന്ന ബെഞ്ചാണ് കേന്ദ്ര സർക്കാരിനും ത്രിപുര സർക്കാരിനും നോട്ടീസ് നൽകിയിരിക്കുന്നത്. ഇവർക്കെതിരെ പോലീസ് നിർബന്ധിത നടപടി സ്വീകരിക്കരുതെന്നും കോടതി ചൂണ്ടിക്കാട്ടി.

യുഎപിഎയിലെ ചില ഭാഗങ്ങൾ ഭരണഘടനാ വിരുദ്ധമാണെന്നും തങ്ങൾക്കെതിരെയുള്ള എഫ് ഐ ആർ റദ്ദാക്കണമെന്നും ആവശ്യപ്പെട്ടാണ് സുപ്രീം കോടതി അഭിഭാഷകനായ മുകേഷ്, അൻസാരി ഇന്ദോരി, ന്യൂസ് ക്ലിക്ക് മാധ്യമപ്രവർത്തകൻ ശ്യാം മീര സിംഗ് എന്നിവർ സുപ്രീം കോടതിയെ സമീപിച്ചത്.

ന്യൂഡൽഹി: വിളകളുടെ അവശിഷ്ടങ്ങൾ കത്തിക്കുന്നതിൽ നിന്ന് കർഷകരെ സർക്കാർ തടയണമെന്നു സുപ്രീം കോടതി. ഡൽഹിയിലെയും മറ്റു സംസ്ഥാനങ്ങളിലെയും വായു മലിനീകരണം രൂക്ഷമായ സാഹചര്യത്തിലാണു വിഷയത്തിൽ നിലപാടെടുക്കാൻ സുപ്രീം കോടതി സർക്കാരിനോടു നിര്‍ദേശിച്ചത്. കർഷകരെ ശിക്ഷിക്കണമെന്ന അഭിപ്രായമില്ലെന്നും കോടതി വ്യക്തമാക്കി.

കർഷകർക്കെതിരെ നടപടിയെടുക്കണമെന്നു ഞങ്ങൾക്ക് ആഗ്രഹമില്ല. ഒരാഴ്ചത്തേക്കെങ്കിലും കാർഷികാവശിഷ്ടങ്ങൾ കത്തിക്കരുതെന്ന് കർഷകരോട് അഭ്യർഥിക്കാൻ കേന്ദ്രസർക്കാരിന് നിർദേശം നൽകിയിട്ടുണ്ട്– ചീഫ് ജസ്റ്റിസ് എന്‍.വി.രമണ പറഞ്ഞു. ടിവിയിലെ ചര്‍ച്ചകളാണു മറ്റെന്തിനേക്കാളും മലിനീകരണം ഉണ്ടാക്കുന്നത്. എല്ലാവർക്കും അവരുടേതായ അജൻഡകളുണ്ട്. വിഷയത്തിന് ഒരു പരിഹാരം കാണാനാണു ശ്രമിക്കുന്നതെന്നും കോടതി വ്യക്തമാക്കി.

കത്തിക്കുന്നതിനു പകരം മറ്റെന്തെങ്കിലും വഴി കണ്ടെത്താൻ കർഷകരെ സഹായിക്കണമെന്ന നിലപാട് ജസ്റ്റിസ് സൂര്യകാന്ത് ആവർത്തിച്ചു. കർഷകരുടെ അവസ്ഥകൂടി പരിഗണിക്കണം. ആരും അതിലേക്കു നോക്കുന്നില്ല. വൈക്കോൽ കത്തിക്കുന്നതിനു കർഷകരെ പ്രേരിപ്പിക്കുന്നതെന്താണെന്നു പരിശോധിക്കണം. ഡൽഹിയിലെ പഞ്ചനക്ഷത്ര ഹോട്ടലുകളിൽ ഉറങ്ങുന്നവരാണു കർഷകരെ കുറ്റപ്പെടുത്തുന്നത്. ചെറുകിട കർഷകർക്ക് ഈ പറയുന്ന യന്ത്രങ്ങളുടെ ചെലവ് താങ്ങാനാകുമോയെന്നും അദ്ദേഹം ചോദിച്ചു.

വൈക്കോൽ കത്തിക്കുന്നതിലൂടെ മലിനീകരണത്തിന്റെ 4–7 ശതമാനം മാത്രമാണ് ഉണ്ടാകുന്നതെന്ന് കോടതിയെ താന്‍ തെറ്റിദ്ധരിപ്പിക്കാൻ ശ്രമിച്ചതായാണു വാർത്തകളെന്നു കേന്ദ്രസർക്കാരിനു വേണ്ടി ഹാജരായ സോളിസിറ്റർ ജനറൽ തുഷാർ മേത്ത കോടതിയിൽ ബോധിപ്പിച്ചു. എന്നാൽ കണക്കുകൾ കോടതിക്കു പ്രധാനമല്ലെന്നും മലിനീകരണം കുറയ്ക്കുന്നതിനാണു പരിഗണനയെന്നും ചീഫ് ജസ്റ്റിസ് രമണ മറുപടി നല്‍കി.