Author: Sreelal

നിയമസഭ തിരഞ്ഞെടുപ്പിൽ വിവാദ പ്രസ്താവനയുമായി കോൺഗ്രസ് നേതാവ് കെ.മുരളിധരൻ എം.പി.തിരഞ്ഞെടുപ്പിൽ രമേശ് ചെന്നിത്തലക്കും, ഉമ്മൻ ചാണ്ടിക്കും തുല്യ പ്രാധാന്യമാണെന്നായിരുന്നു മുരളിയുടെ പ്രസ്താവന.രമേശ് ചെന്നിത്തല മാത്രമല്ല, ഉമ്മൻചാണ്ടിയും മുഖ്യമന്ത്രി സ്ഥാനത്തേക്ക് മത്സരിക്കുമെന്ന സൂചനയും മുരളീധരൻ നൽകി. കൂടുതൽ എം.എൽ.എമാർ പിന്തുണയ്ക്കുന്നവർ മുഖ്യമന്ത്രിയാവുമെന്നും മുരളീധരൻ അഭിപ്രായപ്പെട്ടു. തൻ്റെ മണ്ഡലമായ വടകര വിട്ട് മറ്റൊരിടത്തേക്കും പ്രചരണത്തിന് പോകില്ലന്നും മുരളി വ്യക്തമാക്കി.മുരളീധരൻ്റെ പരസ്യ അഭിപ്രായപ്രകടനം കോൺഗ്രസിന് ക്ഷീണമായി മാറിയിരിക്കുകയാണ്.നിയമസഭ എങ്ങനെയും പിടിക്കണമെന്ന ഹൈക്കമാൻഡ് നിർദ്ദേശം നിലനിൽക്കെ, പരസ്യ പ്രസ്താവന കെ.പി.സി.സി വിലക്കിയിട്ടും മുരളി അഭിപ്രായം തുറന്നടിക്കുന്നത് വിജയ സാധ്യതകളെ ബാധിക്കുമെന്ന ആശങ്കയും യു.ഡി.എഫ് നേതൃത്വത്തിനുണ്ട്.

വഞ്ചിയൂർ ട്രഷറി തട്ടിപ്പിൽ വിജിലൻസ് അന്വേഷണമില്ലന്ന് ധനമന്ത്രി ഡോ.ടി.എം തോമസ് ഐസക്.നിയമസഭയിൽ ധനകാര്യ വകുപ്പിൻ്റെ ചർച്ചയിലാണ് മന്ത്രി ഇക്കാര്യത്തിലുള്ള നിലപാട് വ്യക്തമാക്കിയത്. ട്രഷറി തട്ടിപ്പ് ഗൂഡാലോചനയുടെ ഭാഗമല്ല, ഒരു വ്യക്തിയുടെ മാത്രം പിഴവാണ്. മാത്രമല്ല, പണം തിരിച്ച് ഈടാക്കാനുള്ള നടപടികൾ തുടങ്ങിയെന്നും ധനമന്ത്രി വ്യക്തമാക്കി. തട്ടിപ്പിന് കാരണം സോഫ്റ്റ് വെയറിലെ പിഴവല്ലന്നും മന്ത്രി നിയമസഭയിൽ അറിയിച്ചു
രാവിലെ 9 മണിക്ക് നിയമസഭ സമ്മേളനം തുടങ്ങിയപ്പോൾ, ധനകാര്യ വകുപ്പിൻ്റെ ചോദ്യോത്തരവേളയാണ് നടന്നത്. ലൈഫ്മിഷൻ പദ്ധതിയിലെ കോടതി വിധിയുടെ പശ്ചാത്തലത്തിൽ, അടിയന്തര പ്രമേയത്തിന് അനിൽ അക്കര എം.എൽ.എ നോട്ടീസ് നൽകിയിരിക്കുകയാണ്. ഇതിനിടയിൽ നിയമസഭ ഓഡിറ്റിൽ ഉൾപ്പെടാത്ത കാര്യങ്ങൾ, CAG – കരട് റിപ്പോർട്ടിൽ ഉൾപ്പെടുത്തിയിട്ടുണ്ടെന്നും തോമസ് ഐസക് നിയമസഭയിൽ കുറ്റപ്പെടുത്തി.

ഇടുക്കി ജില്ലയിലെ കുത്തകപ്പാട്ട ഭൂമി വനഭൂമിയാക്കാനുള്ള നീക്കത്തിൽ നിന്നും ഫോറസ്റ്റ് ഉദ്യോഗസ്ഥർ പിന്മാറണമെന്ന് ഇടുക്കി ഡി.സി.സി പ്രസിഡൻറ് ഇബ്രാഹിം കുട്ടി കല്ലാർ. സാമ്പിൾ പ്ലോട്ട് സർവ്വേയുടെ മറവിൽ 40 ഉം,50 ഉം വർഷമായി കർഷകർ കയ്യിൽ വച്ചിരിക്കുന്ന ഏലമലക്കാടുകൾ വനഭൂമിയാക്കി മാറ്റാനുള്ള നീക്കം എന്ത് വില കൊടുത്തും ചെറുക്കുമെന്നും ഇബ്രാഹിം കുട്ടി കല്ലാർ പറഞ്ഞു. കാർഷിക മേഖലയെ ബഫർ സോണാക്കി മാറ്റിയതിലൂടെ നിരവധി കർഷകർ കുടിയിറക്ക് ഭീഷണിയിലാണ്.ജനവാസ മേഖലകളും, കൃഷിയിടങ്ങളും പൂർണമായും ബഫർ സോണിൽ നിന്നും ഒഴിവാക്കണമെന്നും, ഇതിനായി കർഷകരുടെ സംയുക്ത യോഗം ജനുവരി മാസം പതിനഞ്ചാം തിയതി ചേർന്ന് ശക്തമായ പ്രതിഷേധ പരിപാടികൾക്ക് രൂപം നൽകും.