Author: Sreelal

ഉഴവൂരിൽ വാഹനാപകടത്തിൽ വനിത ഓട്ടോ ഡ്രൈവർ മരണപ്പെട്ടു. ചങ്കരാശ്ശേരിൽ വിജയമ്മ (54) ആണ് മരിച്ചത്.ഓട്ടോ ഓടിച്ച് ഉപജീവനം നടത്തിയിരുന്ന വിജയമ്മ, ഉഴവൂർ വെളിയന്നൂർ പടിഞ്ഞാറേ പീടികയ്ക്ക് സമീപത്ത് വച്ചുണ്ടായ അപകടത്തിലാണ് മരിച്ചത്.സ്ഥിരം ബംഗാളി പണിക്കാരുടെ ഓട്ടമുണ്ടായിരുന്ന വിജയമ്മ, ഓട്ടത്തിനിടയിൽ നായ കുറുകെ ചാടിയപ്പോഴായിരുന്നു അപകടം.നിയന്ത്രണം വിട്ട ഓട്ടോ സമീപത്ത് തിട്ടയിൽ ഇടിച്ച് വട്ടം മറിയുകയായിരുന്നു. അപകടസ്ഥലത്ത് വച്ച് തന്നെ ഇവർ മരിച്ചിരുന്നു.വനിതകൾക്കായുള്ള സർക്കാർ സ്വയംതൊഴിൽ പദ്ധതിയിലാണ് വിജയമ്മക്ക് ഓട്ടോ ലഭിച്ചത്. മൃതദേഹം നിലവിൽ കൂത്താട്ടുകുളം ദേവമാത ഹോസ്പിറ്റലിലാണ്.

തദ്ദേശ സ്വയംഭരണ തിരഞ്ഞെടുപ്പിൽ മത്സരിച്ച സ്ഥാനാർത്ഥികൾ ജനുവരി 14ന് മുൻപ് തിരഞ്ഞെടുപ്പ് കണക്കുകൾ നൽകണമെന്ന നിർദ്ദേശവുമായി സംസ്ഥാനതിരഞ്ഞെടുപ്പ് കമ്മീഷൻ. മത്സരിച്ച മുഴുവൻ സ്ഥാനാർത്ഥികളും തിരഞ്ഞെടുപ്പ് ചിലവടക്കം കണക്കുകൾ നൽകണം. ഗ്രാമ പഞ്ചായത്തിലേക്ക് മത്സരിച്ചർ കണക്കുകൾ ബ്ലോക്ക് പഞ്ചായത്ത് സെക്രട്ടറിക്കും, ബ്ലോക്ക് പഞ്ചായത്തിലേക്ക് മത്സരിച്ചവർ ജില്ലാ പഞ്ചായത്ത് സെക്രട്ടറിക്കും, ജില്ലാ പഞ്ചായത്ത് / മുൻസിപ്പാലിറ്റിയിലേക്ക് മത്സരിച്ചവർ ജില്ലാ കളക്ടർക്കും കണക്കുകൾ നൽകണം. നിർദ്ദേശിച്ച തിയതിക്കകം തിരഞ്ഞെടുപ്പ് കണക്കുകൾ സമർപ്പിക്കാത്തവരെ 6 വർഷത്തേക്ക് തിരഞ്ഞെടുപ്പിൽ മത്സരിപ്പിക്കുന്നതിന് അയോഗ്യത കൽപ്പിക്കുന്നതായിരിക്കും.

ലൈഫ്മിഷൻ ക്രമക്കേടുമായി ബന്ധപ്പെട്ട്, കോടതിവിധിയെക്കുറിച്ച്പ്രതികരണമാരാഞ്ഞ മാധ്യമ പ്രവർത്തകരോട് പൊട്ടിത്തെറിച്ച് കെ.പി.സി.സി പ്രസിഡൻ്റ് മുല്ലപ്പള്ളി രാമചന്ദ്രൻ. മാധ്യമ പ്രവർത്തകരുടെ ചോദ്യത്തിൻ്റെ തുടക്കത്തിൽ തന്നെ സർക്കാരിനെ കുറ്റപ്പെടുത്തിയ മുല്ലപ്പള്ളി, പദ്ധതിയിൽ ക്രമക്കേട്നടത്തിയെന്നആരോപണമുന്നയിച്ച തിനിടയിൽ, മാധ്യമപ്രവർത്തകരിലൊരാളുടെ വെൽഫെയർ പാർട്ടി ബന്ധം സംബന്ധിച്ച ചോദ്യത്തിന്ചൂടായിസംസാരിക്കുകയായിരുന്നു. നിങ്ങൾ ആർക്ക് വേണ്ടിയാണ് വന്നിരിക്കുന്നതെന്ന് ചോദിച്ച മുല്ലപ്പള്ളി, ഇതാരുടെ അജണ്ടയാണെന്ന് ചോദിക്കുകയായിരുന്നു. തുടർന്ന് ക്ഷുഭിതനായ കെ.പി.സി.സി പ്രസിഡൻ്റ് കൂടുതൽ പ്രതികരണങ്ങൾക്ക് നിൽക്കാതെ മടങ്ങുകയായിരുന്നു.

തൊടുപുഴ മുൻസിപ്പാലിറ്റി സ്റ്റാൻഡിങ് കമ്മിറ്റി തെരഞ്ഞെടുപ്പിൽ യു.ഡി.എഫ് – ബി.ജെ.പി അവിശുദ്ധ കൂട്ട് കെട്ട്. മുൻസിപ്പാലിറ്റിയിൽ നടന്ന സ്റ്റാൻഡിങ് കമ്മിറ്റി തെരഞ്ഞെടുപ്പിലാണ് പുതിയ രാഷ്ട്രീയ കൂട്ടുകെട്ടുകൾ ഉരിത്തിരിഞ്ഞത്.ഇരു മുന്നണികളും ഇവിടെ പരസ്പരം വോട്ട് ചെയ്യുകയായിരുന്നു. ഇലക്ഷനിൽ 3 സ്റ്റാൻഡിങ് കമ്മിറ്റി യു.ഡി.എഫിനും, 2 എണ്ണം ബി.ജെ.പിക്കും കിട്ടി. മുൻസിപ്പാലിറ്റി ഒരംഗത്തിൻ്റെ പിന്തുണയോടെ ഭരിക്കുന്ന എൽ.ഡി.എഫിന് സംഭവം വൻ തിരിച്ചടിയായിമാറുകയും ചെയ്തു. തദ്ദേശ സ്വയംഭരണ തിരഞ്ഞെടുപ്പിലെ അവിശുദ്ധ കൂട്ട് കെട്ടാണ് പരസ്യ ബാന്ധവത്തിലെത്തിയതെന്ന് എൽ.ഡി.എഫ് ആരോപണമുന്നയിച്ചതിനെ, രാഷ്ട്രീയ അധാർമ്മികതയ്ക്കുള്ള മറുപടിയെന്നായിരുന്നു യു.ഡി.എഫ് മറുപടി. സംഭവം യു.ഡി.എഫിൽ വൻ വിവാദം സൃഷ്ടിച്ചിരിക്കുകയാണ്.