മുംബൈ: കോവിഡ് വ്യാപനം രൂക്ഷമായതിനെത്തുടർന്ന് മഹാരാഷ്ട്രയിൽ വാരാന്ത ലോക്ക്ഡൗൺ പ്രഖ്യാപിച്ചു. വെള്ളിയാഴ്ച രാത്രി എട്ടു മുതൽ തിങ്കളാഴ്ച രാവിലെ ആറുവരെയാണു ലോക്ക്ഡൗൺ. സംസ്ഥാനത്ത് രാത്രികാല കർഫ്യൂ തുടരുമെന്ന് മന്ത്രി നവാബ് മാലിക് അറിയിച്ചു. മഹാരാഷ്ട്രയിൽ പ്രതിദിന കോവിഡ് കേസുകൾ 50,000നു മുകളിലാണ്.
വാരാന്ത ലോക്ക്ഡൗണിനു പുറമേ ഇന്നു രാത്രി എട്ടു മുതൽ നിയന്ത്രണങ്ങൾ കർശനമാക്കും. ഷോപ്പിംഗ് മാളുകൾ, ബാറുകൾ, റസ്റ്ററന്‍റുകൾ, ചെറു കടകൾ എന്നിവിടങ്ങളിൽനിന്നു സാധനങ്ങൾ പാഴ്സലായി വാങ്ങാൻ മാത്രമേ അനുവദിക്കൂ. സർക്കാർ ഓഫീസുകൾ 50 ശതമാനം ജീവനക്കാരോടുകൂടി പ്രവർത്തിക്കും. തിയറ്ററുകൾ അടച്ചിടും. സിനിമ, ടെലിവിഷൻ ഷൂട്ടിംഗ് അനുവദിക്കും. പാർക്കുകളും കളിസ്ഥലങ്ങളും അടച്ചിടും. പൊതുഗതാഗത സംവിധാനം പ്രവർത്തിക്കും.
57,074 പുതിയ കേസുകളാണ് മഹാരാഷ്ട്രയിൽ ഞായറാഴ്ച്ച റിപ്പോർട്ട് ചെയ്തത്. കോവിഡ് മഹാമാരി പൊട്ടിപ്പുറപ്പെട്ടതിനു ശേഷം മഹാരാഷ്ട്രയിൽ റിപ്പോർട്ട് ചെയ്യപ്പെടുന്ന ഏറ്റവും ഉയർന്ന നിരക്കാണിത്. കോവിഡ് ബാധിച്ച് 222 പേരും ഞായറാഴ്ച്ച സംസ്ഥാനത്ത് മരിച്ചു. 4,30,503 ആക്ടീവ് കോവിഡ് കേസുകളാണ് മഹാരാഷ്ട്രയിലുള്ളത്. 22,05,899 പേർ ഹോം ക്വാറന്റീനിലും 19,711 പേർ ഇൻസ്റ്റിറ്റ്യൂഷണൽ ക്വാറന്റീനിലുമാണ്.
