0 Comments

കൊച്ചി: ഐഎസ്ആർഒ കേസിലെ ഗൂഢാലോചന സംബന്ധിച്ച അന്വേഷണം സിബിഐക്ക് കൈമാറിയ സുപ്രീംകോടതി വിധി സ്വാഗതം ചെയ്ത് കോൺഗ്രസ് നേതാവ് കെ മുരളീധരൻ. കേസിൽ അന്വേഷണം നടക്കട്ടേയെന്നും ബാക്കി റിപ്പോർട്ട് പുറത്തുവന്ന ശേഷം പറയാമെന്നും മുരളീധരൻ പറഞ്ഞു. ചാരക്കേസുമായി ബന്ധപ്പെട്ട ജസ്റ്റിസ് ഡികെ ജയിൻ കമ്മീഷൻ റിപ്പോർട്ട് പ്രാഥമിക അന്വേഷണ റിപ്പോർട്ടായി കണക്കാക്കി അന്വേഷണം ഏറ്റെടുക്കാമെന്ന് സുപ്രീംകോടതി വിധി.

മുരളീധരന്റെ പിതാവും മുൻ മുഖ്യമന്ത്രിയുമായ കെ കരുണാകരൻ പ്രതിസ്ഥാനത്തു നിൽക്കുന്ന കേസാണ് . കേസുമായി ബന്ധപ്പെട്ട ആരോപണങ്ങളെത്തുടർന്ന് കരുണാകരന് മുഖ്യമന്ത്രി സ്ഥാനം രാജിവെക്കേണ്ടി വന്നിരുന്നു. പിന്നാലെ അധികാരത്തിൽ വന്ന ഇടത് സർക്കാർ കേസിൽ പുനരന്വേഷണം പ്രഖ്യാപിച്ചെങ്കിലും കോടതി ഇടപെട്ട് തടഞ്ഞിരുന്നു.

ഡിജെ ജയിൻ കമ്മീഷൻ റിപ്പോർട്ട് സിബിഐക്ക് കൈമാറുമെന്നും റിപ്പോർട്ട് പരസ്യപ്പെടുത്തില്ലെന്നും കോടതി പറഞ്ഞു. നമ്പി നാരായണനെ കുടുക്കാൻ കേരളാ പോലീസ് ഗൂഢാലോചന നടത്തിയിട്ടുണ്ടോയെന്നാണ് സിബിഐ അന്വേഷിക്കുക. മൂന്ന് മാസത്തിനുള്ളിൽ അന്വേഷണം നടത്തി റിപ്പോർട്ട് സമർപ്പിക്കണമെന്നാണ് കോടതി ഉത്തരവ്. രണ്ട് പതിറ്റാണ്ടോളം നീണ്ടു നിന്ന കേസാണിത്. വലിയൊരു നിയമ പോരാട്ടത്തിലൂടെയാണ് നമ്പി നാരായണൻ അനുകൂല വിധി നേടിയത്.

റിപ്പോർട്ടിന്റെ പകർപ്പ് വേണമെന്ന നമ്പി നാരായണന്റെ ആവശ്യം കോടതി തള്ളി. സിബിഐക്ക് റിപ്പോർട്ട് നൽകരുതെന്ന കേന്ദ്രത്തിന്റെ ആവശ്യം കോടതി തള്ളിയിരുന്നു. സിബിഐ ഡയറക്ടർക്കോ ആക്ടിങ് ഡയറക്ടർക്കോ റിപ്പോർട്ട് കൈമാറാനാണ് കോടതിയുടെ നിർദ്ദേശം. സിബിഐ അന്വേഷണത്തിലൂടെ കുറ്റക്കാരെ കണ്ടുപിടിക്കണമെന്നും നടപടി സ്വീകരിക്കുമ്പോൾ മാത്രമേ നീതി ലഭിച്ചുവെന്ന് പറയാൻ സാധിക്കൂ എന്നും നമ്പി നാരായണൻ അഭിപ്രായപ്പെട്ടു.

Author

chinjumeenu2016@gmail.com

Leave a Reply

Your email address will not be published. Required fields are marked *

error: Content is protected !!