0 Comments

ഡല്‍ഹി: കേന്ദ്രസര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കും കേന്ദ്രസര്‍ക്കാരിന്‍റെ ദീപാവലി സമ്മാനം. കേന്ദ്രസര്‍ക്കാര്‍ ജീവനക്കാരുടെ ക്ഷാമബത്ത അഞ്ച് ശതമാനം വര്‍ധിപ്പിച്ചു. പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ചേര്‍ന്ന കേന്ദ്രമന്ത്രിസഭാ യോഗമാണ് ക്ഷാമബത്ത അഞ്ച് ശതമാനം വര്‍ധിപ്പിക്കാന്‍ തീരുമാനമെടുത്തത്. ഏഴാം ശമ്പള കമ്മീഷന്‍റെ ശുപാര്‍ശകള്‍ പരിഗണിച്ചാണ് വര്‍ധന നടപ്പാക്കുന്നത്.

പെന്‍ഷന്‍കാര്‍ക്കുള്ള ഡിയര്‍നെസ് റിലീഫും (ഡിആര്‍) വര്‍ധിപ്പിച്ചിട്ടുണ്ട്. കേന്ദ്രമന്ത്രി പ്രകാശ് ജാവദേക്കറാണ് വാര്‍ത്താ സമ്മേളനത്തില്‍ ഇക്കാര്യം പ്രഖ്യാപിച്ചത്. 50 ലക്ഷത്തോളം കേന്ദ്രസര്‍ക്കാര്‍ ജീവനക്കാര്‍ക്കും 62 ലക്ഷം പെന്‍ഷന്‍കാര്‍ക്കും ഇതിന്‍റെ പ്രയോജനം ലഭിക്കുമെന്നും ക്ഷാമബത്ത വര്‍ധന കേന്ദ്രസര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കുമുള്ള ദീപാവലി സമ്മാനമാണെന്നും പ്രകാശ് ജാവദേക്കര്‍ പറഞ്ഞു. വര്‍ധന 2019 ജൂലൈ മുതലുള്ള മുന്‍കാല പ്രാബല്യത്തോടെ കേന്ദ്രസര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കും ലഭ്യമാകും.

നിലവില്‍ 12 ശതമാനമാണ് കേന്ദ്രസര്‍ക്കാര്‍ ജീവനക്കാരുടെ ക്ഷാമബത്ത. വര്‍ധന പ്രഖ്യാപിച്ചതോടെ ഇനിയിത് 17 ശതമാനമാകും. ആശ വര്‍ക്കര്‍മാരുടെ വേതനം ഇരട്ടിയാക്കാനും കേന്ദ്രമന്ത്രിസഭാ യോഗം തീരുമാനിച്ചതായി പ്രകാശ് ജാവദേക്കര്‍ അറിയിച്ചു. ആയിരം രൂപയില്‍ നിന്ന് രണ്ടായിരം രൂപയായാണ് ആശ വര്‍ക്കര്‍മാറുടെ വേതനം ഉയര്‍ത്തുക.

Leave a Reply

Your email address will not be published. Required fields are marked *